في ناس تقول علي جوك قاسي
وناس تقول علي بحرك غدار
وناس تقول ال سمكك غالي
وقال ايه كمان شوارعك زحمه!!!
بس انا بس اللي عارفه
عارفه ازاي انتي بلد بتنبض
وتحس باللي بيحبها بجد
وجايلها بشوق حقيقي
ساعتها بس
جوك القاسي يبقي
مزاجه
بحرك الغدار يكون
مرايته
والسمك الغالي
يرخصله
والزحمه في عز شتاكي
تبقي يادوب
كام واحد علي طول كورنيشيك
حنينه انتي مع اللي يحبك
يا اسكندريه
علشان كده يوم ما حبيت
حبيت من ولادك
يمكن علشان فيه كل صفاتك
ماهو تربيتك
ولا علشان يفضل قلبي طول عمري
متشعلق بيكي
انا ماحبتكيش علشانه
بس
ممكن اكون حبيته علشانك..
ليست هناك تعليقات:
إرسال تعليق