الاثنين، 4 أغسطس 2008

كلام جديد

بقالي كتير ما كتبتش

وحشت القلم حبره جواه خنقه

بس مش عايزه اكتب

لا انا مش عارفه اكتب
حتي لما حاولت القلم خاصمني
ماهو برضه عنده كرامه
فضلت احايله واحلفله اني مش هاعمل كده تاني
كتبنا وكأننا ماكتبناش قبل كده
زمااان كنا بنكتب
"لقد بدات التجربه في سن لا يسمح لها بالابواب الخلفيه...!!!!"
كلام مجعلص
فلسفه فاضيه
سفسطه لعلاقه فاشله
كلام محجب
بس يمكن يكون كلام حقيقي
لاحساس حقيقي
لشخص مش حقيقي
دلوقتي
انا والقلم وبس
كلام مايص مش موزن بس اكيد حقيقي
كلام عايق مش مترتب لكن محسوس
كلام لابس قصير ومابتكسفش
كلام يتغزل في حته شيكولاته
ويحكي احساسه بالناس كلها
كلام مليان حريه

وانا في الشغل

صوت التليفزيون
مزيعه عماله تزززن
وصوت مكن
شغال يوووور
وموبايل بيرن
رنه متوتره جدا
وانا معديه من قدام مرايا
فجاه ماسمعتش اي حاجه
لاني ببساطه ماعرفتش
مين اللي كانت بصالي من المرايا دي
ماخفتش
ومديت ايدي اسلم
مدت ايديها
ضحكتلها..ضحكتلي
قربنا ايدينا علشان نسلم
ادينا خبطت في المرايا وماسلمتش
عرفت ان بيني وينها حاجز
زعلت قوي
وهي كمان زعلت
كان نفسي قوي اتعرف عليها
لسه هاكلمها من بعيد
الموبايل ررررررن تاني
والمكن رجع يووور
ياااااه دي المزيعه لسه بتززززن

ملح الارض

قاعدت افكر كتير
هما الناس المهمشين
عارفين انهم مهمشين؟
ولا كل واحد جوه نفسه سيد؟
طب لو سيد احنا ليه شعب عبيد؟
ولااااااا احنا شعب عبيط؟

عم نجم

احمد فؤاد نجم
شاعر تكدير الامن العام
وعدل مزاجي الخاص

باولو كويلو

مش باولو كويلو اللي علمني اقراء العلامات
بس هو اللي فهمني ان العلامات
لغه كونيه

شبرا وجمال شبرا

شبرا قريبه من كل حته
الزمالك - المهندسين
مصر الجديده - وسط البلد
الطريق الزراعي -محطه مصر
شبرا زحمه بس بتمشي بسرعه
فيها احسن مسيحي ومسلم
ماتفرقهمش عن بعض
فيها احلي مقله لب
واجمد طعميه وعيش تجيبهم من شبرا
يمكن ناسها غلابه
بس هيه اصيله
انا اتولدت في طنطا
وكليتي كانت في المنيا
وعايشه وبشتغل في مدينه نصر
وبحب اسكندريه
بس عمري ما نسيت شبرا

واحد اسكندراني

واحد بحبه مره قال
احنا مش قد البحر
ولما نيجي نعافره ويغلبنا نقول عليه غدار
حبيته قوي لما قال كده
حسيت انه شبهي
وفاهمني
والاهم انه فاهم البحر
اصله اسكندراني
متربي علي صوت البحر
والجري تحت المطر
وكورنيش اسكندريه القديم
وبيركب الترام
وبيشرب احلي شيشه تفاح
عارف مواعيد النوات
واساميها
وبيهرب ن زحمه اسكندريه في الصيف
ومايطلعش منها في الشتا
زي اللي عليه احكام
اه بيوحشني
بس انا اللي اروحله
اصلي عمري ما شفته
من غير ما تكون خلفيته البحر

الشتا

خسرت خساره عمرك
يااللي ما رحت اسكندريه في الشتا
تبقي ماشفتش جمال
تبقي ما عرفتش الحقيقه
وهاتعيش طول عمرك
في وهم ان البحر غدار
وان اسكندريه برد في الشتا
اسكندريه كل ما تشتي
يا ابني بتدفي
وبعد كل نوه
نسمه حلوه
البحر فعلا مش غدرا
ولا هو يعني علشان ساكتلنا
وقاعد من كام مليون سنه يتفرج علينا
روح وشوفه في الشتا
هاتعرف انك مش اده
وانه اقوي منك وبيحذرك
انك ماتستهونش بيه
ومش مشكلته خااااااالص
انك ماروحتش
اسكندريه في الشتا

مامتي

زمان عم احمد فؤاد نجم قال
(لما بتكرهه..تكرهه موت
ولما تحب ..تحب صبابه
واما بتفرح..يبقي الفرح علي البوابه
واما بتزعل تبقي ربابه)
ده اكيد بيتكلم عن امي مش عن مصر
امي اللي تبان اصغر مني بس شايله الهم
شايلاه من ضغرها شيل
لا تعبت ولا حتي قالت بم
اه هي غاويه شويه افلام واغاني
من اجل ابنائي
وكتاب حياتي
وحكايتي مع الزمان
بس برضو ضحكتها تجنن
طول عمرها جميله
خدت حظها في جمالها
واحتمال في عيالها
بس اللي اضمنهولها
انها ليها بدل الجنه كذا جنه
مش قادره اوعدها تشوفني احسن واحده
ولا حتي اجمل واحده
كل اللي اقدر اوعدها بيه
انها تلاقيني اكتر واحده
بتحب واحده
اسمها ماما
وابو ام اللي يزعل يا شيخه...

مستشفي الساحل

كان في قدام بيتنا مستشفي
وكان واضح ان عزرائيل عنده اوردر هناك
كل يوم الساعه 6 الصبح
وانا معاد صحياني كان 7
بس كل يوم كان لازم اصحي 6
علي صوت اهل الاخ اللي روح مع عزرائيل
ودي من الحاجات اللي خلتني اكرهه الموت قوي
علشان كان بيصحيني بدري

الأحد، 3 أغسطس 2008

فخفخينا علي لون بني

الفــخــفـخـيـنـا
كل العصاير علي بعض
الــلــون الــبــنــي
كل الالوان علي بعض
الانســــــــــان
ملاك وشيطان مع بعض
الــــبــــلـد
شوارع زحمه وشوارع رايقه حوالين بعض
الـــــــــخريطه
دول كبيره ودول صغيره فوق بعض
الــــنــــاس
ناس غنيه وناس فقيره بياكلوا في بعض
الــــــدنــــــيا
جنه ونار في بعض
الـــــضمــــــــير
ثواب وعقاب اد بعض

مافيش حاجه من دول ليها نسبه
كله فخفخينا علي لون بني

هي الدنيا كده

قلها كل اللي اتعلمته
احكيلها كل اللي شفته
لخصلها تجاربك علي شكل حكم ومواعظ
وسعات حواديت ال يعني انت ما تقصدش
فهما...الصح فين والغلط
اعمل كل اللي تقدر عليه
برضو..هاتمر بتجاربها الخاصه
وتعيش لوحدها احزانها وصدامتها
وتحلم احلام مختلفه
وتوصل او ما توصلش
بس في الاخر هايفضل معاها
شويه حواديت تحكيها لولادها ال يعني هي ما تقصدش
ومايعملوش بيها