الخميس، 19 مارس، 2009

ثوره

كده علي اخر الليل
اخدت قرار ثوره
مالهاش اي لازمه
شربت كام سيجاره
وكتبت بدخانهم اسمك
لغايه ما اسمك بقي في كل مكان حواليه
ال يعني ماكنش كفايه انه في كل مكان جوايه
ركبت لنفسي جناحين طيرت بيهم
وقفت قدام شباك قلبك
قلتله كل اللي ماكنش ينفع اقوله
وحلفته ما يجبلكش سيره
وطيرت تاني
رجعت مكاني
وولعت سيجاره كمان

عنيه لما اطفت

حبيتك تحت نور شمس صادق واضح
عكس وضوحه علي عنيه لما لمعت لاول مره
وعرفت اني حبيت
وان حياتي خلاص ماينفعش ترجع زي الاول
وان عيني استحاله تطفي تاني
حتي لو في ليل اسود غطيس
ضلمه ملاوعه
بتترعب من اي شمعه نورها علي قدها
او حتي قنديل ضيه بيرتجف
نفس الليل اللي خبيت في حبك من سنين

الأربعاء، 7 يناير، 2009

قطع العوايد فال


هي عادتك ولا هاتشتريها
تطلع فجأه في حياتي
من اكتر شارع ضلمه فيها
هي عادتك ولا هاتشتريها
تستني اكبر طاقه نور تظهر في حياتي
وتسبني اشوفها لوحدي وهي بتطفي
هي عادتي ولا هاشتريها
استني النور يختفي
واختار اكتر حته ضلمه
واقف فيها استناك

يابختك بقسوتك

دوس عليه زي ما بدوس علي سيجارتك
من غير رحمه
اقسي عليه زي ما بتقسي علي كل
حاجه في حياتك
علشان ده طبعك
اوعي تسيبه الا لما تتاكد انه مات خالص
ماتخافش..
انا اللي بقولك اعمل كده
ماهوانت كمان ما تمشيش وتسبلي
قلبي لامنه عايش ولامنه ميت
حرام عليك

انت والشعر الابيض :))


عمري ما خفت من الشعر الابيض
علي اد ما اترعبت لما لاقيت شعره بيضا
ظهرت وانت ماشفتهاش
ياااه انا بكبر من غيرك ولا ايه؟؟!!

الجمعة، 26 ديسمبر، 2008

باب مقفول

بدور علي مفتاح باب الدنيا المقفول
من بين مليووون مفتاح
ولا واحد منهم معايه

السبت، 20 ديسمبر، 2008

انا شفت الفيلم ده قبل كده


رجعت تاني استخدم نفس البرفيوم اللي كنت بستخدمه معاك
والبس السلسله اللي كنت جايبهالي من غير اي مناسبه
غير انك حسيتها شبهي
عملت كده من غير ما احس انهم بيوجعوني
بذكراك
ورجعت اشتري هدومي علي زوقك
واحسب معاد رجوعك
واستني تليفونك
رجعتلك نفس الرنه القديمه
حنــــــــــــيـــــــــــن
لما غنتها شرين
رجعت اقدر اشوف نفسي في المرايا
ولما شفتك في عنيه
عرفت اني رجعت احبك من اول وجديد
واستنيتك توجعني تاني