باب مقفول

بدور علي مفتاح باب الدنيا المقفول

من بين مليووون مفتاح

ولا واحد منهم معايه

انا شفت الفيلم ده قبل كده

رجعت تاني استخدم نفس البرفيوم اللي كنت بستخدمه معاك
والبس السلسله اللي كنت جايبهالي من غير اي مناسبه
غير انك حسيتها شبهي
عملت كده من غير ما احس انهم بيوجعوني
بذكراك
ورجعت اشتري هدومي علي زوقك
واحسب معاد رجوعك
واستني تليفونك
رجعتلك نفس الرنه القديمه
حنــــــــــــيـــــــــــن
لما غنتها شرين
رجعت اقدر اشوف نفسي في المرايا
ولما شفتك في عنيه
عرفت اني رجعت احبك من اول وجديد
واستنيتك توجعني تاني

صندوق

هي فين
انا شفتها من فتره
وخبتها بعيد عن عيني
علشان فكرتني بيك
واديني اهو
راجعه بعد كام شهر
كانوا ممكن يكونوا كام سنه
بس كان لازم لازم ارجع
ادور عليها
تحت السرير
في شنطي القديمه
في درج سحري وراه صندوق ذكرياتي
لا اهه لاقتها
ازاي ماجاش المكان ده في بالي
صندوق زكرياتي
كان فيه حاجات كتير قبل ما اعرفك
يوم بعد يوم
سنه بعد سنه
كان بيتجمع فيه تفاصيلك
وبتطرد اي حاجه كانت موجوده
انا دلوقتي لما بشوفه
بقول انه اكيد كان فاضي قبل ما اعرفك
كاني ماكنش عندي ذكريات قبلك
انت تاريخي كله
انت كل اللي فات
وكنت كل اللي جاي
بس عمري ما تخيلت ان هايجي اليوم اللي
تبقي انت فيه عباره
عن صندوق
حتي لو كان صندوق ذكرياتي انا

شفت بقي

ابتديت اعشق ودني لما سمعت صوتك
واحب وعيني لما شافتك
وايدي لما لمستك ايدك
كل حواسي انتعشت بيك
انا اصلا حبيت نفسي بعد ما لاقتها معاك

شقاوه بنات

لما قبلت اصحابي شفتهم
بيتووشوا..وبيغمزوا البعض وهما بيتعجبوا
ماعرفتش يقصدوا ايه بس خمنت
وابتسمت
واول ما ابتسمت
اتعجبوا بزياده
وبدون اتفاق صبرهم نفذ
وسالوا في صوت واحد
هو انتوا رجعتوا لعبض؟
ضحكت زي عيله صغير
وفرحت قوي لما عرفت
انك باين في عنيه قوي كده

جواب ليك انت

بسم الله الرحمن الرحيم
الي الاحب والاغلي.....
الي الذي لاتستقيم الدنيا بعده,,,
الي الذي لا اعود انا بدونه....
الي القادر علي العبث بشرايني.....
الي من خلقت له ومت بدونه.....
الي من يتحكم بثورتي وهدوئي....
الي من لا يعود ابدا....
الي الذي يعرف من هو...

,,,,,,,,,,,,,,,,,,,

ليس عندي ما اقوله ولكني اردت فقط ان اقول هذا لك

من تقف علي ارض احلامها تنتظرك
حتي لو علي هيئه سراب

لانها تزوب حنينا

اليك

اصل البحر

البحر بيصرخ باعلي صوته
يانااااااس يا هوووووووووووو
احبه كتير جم عند شطي ورموا اوجاعهم اهاتهم
يووووووووووووو وووووووووه
اوعوا تفكروني مالح كده من زمان

لا خااااااااالص
ده انا كنت يادوب حبه ميه مطر عادب جميل
بس هي دموع الاحبه
عملت مني يم
شايل هم
ما يتلم

بتحصل

هي نازله علي السلم
كان هو طالع
وفي السلمه اللي اتقابلوا فيها
وقفوا لحظه
هو خد جنب
هي نزلت درجه طلع هو
هي مشيت تنده علي تاكسي
وهو طلع اتغدي ونام
مايعرفوش من اللحظه دي
ابتدي جزء جديد من حياتهم
وان السلمه اللي جمعتهم
ماهي الا بروفه لأيامهم الجايه

مشوار

بقولك ايه؟؟
ماتمشي الشارع ده لأخره
يمكن في نصه تقابل حد يغير مجري حياتك
او تحصل صدفه تقنعك تغير اتجاهك
ويمكن كمان تتكعبل في حفره تعطلك
واكيد...هاتقابل ناس هاتكدرك
ولو ماحصلش كل ده
فأكيد في اخر الشارع حاجات غير اللي في اوله
وماتقدرش تنكر انك هاتوصل لأخره
متغير عن مابتديته
خسرت حاجات بس كسبت حاجات
يبقي مستني ايه؟!!!!!!!
انت بتفكر في تاني؟!!!!
يلا قوم امشي الشارع ده لاخره

لخبطه

باصه علي الوجود اللي حواليه في المرايه
وبطلع الاختلافات!!!!!

شجره الياسمين

كان هناك في انا...

كان هناك في شجره ياسمين...

وكل ما اشم ريحه الياسمين افتكر هناك.!!

غريب قوي ان كل اللي يربطني بمرحله من عمري هيه ريحه الياسمين..!!!

ريحه الياسمين هيه الامان..

ريحه الياسمين راحت علشان تعلمنا غدر الايام...

ريحه الياسمين يعني شمس ساعة ضهريه...

داخله البيت مكسوفه ...

يعني دفا...........

يعني ولد وبنت نايمين علشان المدرسه الصبح...

ريحه الياسمين يعني كل اللي فات...

فضلت طول عمري احن لريحه الياسمين

وفي اليوم اللي كنت خلاص مش هاحن ليها

رحت اشوفها واودعها

قلت هاروح اقولها

"سلام مش هحلم بيكي تاني الامان مش من الياسمين البارفان بس هو اللي من الياسمين...... "

بس لما رحت مقولتش اي حاجه

لاني ببساطه ملقتهاش اصلا

اللي قلعها من جذوري

بنا مكانها حيطه سد عليها ازاز مكسر

فجاه لأيت الشارع صغير قوي

ولا انا اللي كبرت قوي

لا دي السنين اللي بيني وبين الشارع هيه اللي كتير قوي

بيوت كتير كنت بادخلها ياما

حتي مش فاكره اسامي صحابها

مش فاكر من الشارع اي حاجه غير الشجره

اللي مبقتش موجوده

حزنت

بكيت

مشيت

وعرفت بعد كده ان طول عمري هفضل اشتقلها

لاني مش هعرف اودعها

وحلفت

اني ازرع لاولادي شجره ياسمين

علشان ينتموا لها

واني ماسمحش لحد يقلعها من جزورهم

ومايعشوش طول عمرهم زي امهم

يحنوا لريحه الياسمين

غبي

مش قادره احس اتجاهك باي شفقه لانك اغبي من انك تحس بوحده

كل يوم

طول النهار بتعامل مع ناس

وبسمع كلمات

وبمر بمواقف

وبشوف حاجات

مابتثرش جوايه غير الرغبه في نسيانها

كارثه

الكارثه الحقيقيه مش اننا سبنا بعض

الكارثه الحقيقيه مش اني وحيده من غيرك

الكارثه الحقيقيه مش اني اتخيلك مع واحده تانيه

الكارثه الحقيقيه فعلا اني مش عارفه اعيط بعد كل ده

خلاص

خلاص مش هاصحي الصبح تاني
ولا ناويه اشوف شمس تاني
ولا حتي هاقعد في حته نورها جامد
وهالبس نضاره شمس طول الوقت
وابقي شبهه ناديه لطفي في النضاره السودا
لا ده مش اكتئاب
ده انا بس بعود عيني علي الضلمه
اصل حبيبي مش هاينور حياتي تاني

سبحان الله

ربنا اللي خلق الملايكه

هو برضه اللي خلق الشياطين

وخلق بعدهم البني ادمين

وساب جواهم صفات الملايكه كلها

وكل صفات الشياطين

وسابلنا احنا بقي الاختيار

كذااااااب

الحب ما ينفعش ينتهي

لانه سر الوجود

طب انت فين دلوقتي

موجود!!!!!!!!!

بعمل في نفسي حاجات عجب

اوعي تسالني انا ليه حبيتك

انا نفسي مش لاقيه سبب مقنع خلاني اعمل كده

بس يمكن حبيتك لانك انت

هاقول ايه

في ناس دخلت حياتنا وخرجت منها

من غير مايشوفوا واحد منا لوحده

هي دي بالظبط الناس اللي بخاف اقابلها

بخاف يسألوني عنك ماعرفش ارد!!

صدفه

انا وانت نتقابل صدفه؟!!
تخيل!!!!!!!
انا وانت اللي كنا بنقابل الناس سوا صدفه
بقينا بنتقابل صدفه!!!!!!!!
مقابله وخلصت بس احنا كمان خلصنا
سبتك ومشيت
وخفت ابص ورايا
لاني اقنعت نفسي
اني ماشفتكش اصلا
واننا ما اتقبلناش صدفه
ده بس من كتر ما انت واحشني
انا اللي كان بيتهيألي

اخر مره شفته

كانت عنيه بتفضحني

رعشه اديه بتعترف عليا

كنت حاسه انه سامع صوت قلبي

لقيته بيسألني:ايوه يا مي بتندهي؟

قلت :لا

وابتسمت

لما اتأكدت

انه سمع صوت قلبي

باكريز والله

ريحه الجو حلو قوي

اصلي بشرب سيجاره باكريز

كل اللي يشم ريحه الجو

يفتكرني بشرب حشيش

علي بال ما خلصت السجاره

كنت اتسطلت فعلا!!!!

تيجي مع العمي....

انا راحه للمجهول
هاغمض عيني وهاحدف نفسي
مش عايزه اشوف ايه اللي هايحصلي
انا عارفه
ان الي هايحصلي ده ابشع كوابيسي
بس لما فتحت عنيه
لاقيت مكان جميل
مكان ماكنتش عارفه طريقه
وكنت دايخه عليه

في وسط البلد

قاعده في تاكسي بمنتهي الثقه
عماله اتفرج علي خلق الله
يااااااااااا الله
الله يرحمك يا صلاح يا جاهين
وفجاه سمعت اغنيه لفيروز
ولعت سيجاره
وكلت حته شيكولاته
بسمع فيروز وبفكر في جاهين
وبتفرج علي ناس شويه كتير منهم مجانين
طب مين عاقلين
العاقلين....
هما اللي بيصرحوا بجنونهم للتانين
العاقلين....
ناس معترفه انها مجانين
محترفين جنون
محترفين فنون
ماشين
يتفرجوا علي الناس
اللي عاملين عاقلين

३५ंईश्र्श्र्ड कॉल

بدور في تليفوني

بشوف الارقام اللي طلبتني

بصراحه ماكنتش بدور علي رقمك

بس زعلت قوي لما ما لقتوش!!!

اخيرا

علشان الدنيا وهم كبير

ومافيش حقيقه الا الموت

بطلت ادور علي حقيقه اي حاجه

المفروض بيروح فين

بخاف اعمل اي فعل
والله انا مش خايفه من رد الفعل
بالعكس خااااالص انا بخاف لرد الفعل ما يحصلش
مأقصدش رد الفعل اللي علي هوايا
لأ
اقصد رد الفعل المفروض
اصل المفروض دايما ما بيحصلش
طب بقه مفروض ليه بقي؟؟!!!!!!
يعني مثلا لو عملت كذا المفروض يحصل كذا
لكن اللي بيحصل كذا وكذا وكذا وكذا
غير كذا المفروضه خااالص
ويمكن كمان مايحصلش اي كذا
يالاهوي

هلاوس

اوضه ضلمه ومدوره
والغريب اني كنت عارفه الاقي الكورنر
وكمان اقف فيه
وماكنتش لاقيه الباب
كانه فص ملح وداب
ناس كتير حواليه
مش شايفه منهم غير حدود جسمهم
اللي بكل الالوان!!
كلهم بيوشوشني في ودني
ماعرفش ازاي!!!
ومش بيقولوا غير كلمه واحده
هي نفس الكلمه اللي مش عايزه اسمعاه لحد ما اموت

مكالمه

فضلت اتكلم معاه طول الليل
حكتله كل اللي ماكنتش عارفه احكيه
قلتله علي كل اللي مخوفني من الدنيا
حكتله عن احلامي
واجمل اللواني
وعن كوابيس
قلتله اني بعشق الشيكولاته
وباخد كام معلقه سكر علي النسكافيه
حكتله عن اول حب في حياتي
واخر صدمه اتصدمتها
وصفتله الهلاوس اللي بشوفها
حتي احلام اليقظه حكيتهاله
وبعد ماقفلت معاه
حسيت اني استريحت
ونمت بعمق
وماكنش مزعلني غير اني نسيت اساله علي اسمه
اصلي فعلا مااعرفوش دي كانت نمره غلط!!!!!!!!!!

سميط وحلبسه وعقد فل معاهم دبله فضه

علي الكورنيش
مش بشوف غير منظر واحد
بس بالوان مختلفه
ضهر ولد وبنت
حاضنين بعض
مدين ضهرهم لينا باحتقار
وباصين علي الضفه التانيه بانبهار
شكلهم بيضايقني قوي
ماعرفش علشان بيصعبوا عليه؟
ولا علشان عمري ماقعدت زيهم كدا؟؟؟!!!!!!!!

وادي فايده التعليم

الانسان طول الوقت ماشي علي منهج درسه في ثانوي
طول الوقت بيحاول يفلسف حياته
وينفذ بدقه تعليمات علم الاجتماع
ويتكلم باعربي
ويقول طحن وبيس يا مان كاموستوي رفيع
وياخد كورسات انجليزي
ويرمي ذكرياته في التاريخ
ويحسب تصرفات الناس
(علي فكره بيحسب غلط)
ويثبت اكاذيب علم النفس
ويلعب الكومبيوتر
ويرسم علي الناس الدور
ويلعب علي الحبل في الدنيا السيرك
ويدوخ يا عين امه
علشان بس يحط لنفسه مكان علي الخريطه

مع انه قال

قال انه بيحبها
قال انه بيعشقها
قال انها بتوحشه
وقال كمان انها حلمه
وعمره
وانها ام ولاده
قال انه من غيرها يموت
وانها هي ايامه الجايه
وذكرياته الحلوه
وانها حب عمره
انتوا ليه مش عايزين تصدقوها
والله قال كل ده واكتر كمان

اساله مش عايزه اسمع اجوبتها

انا لسه في بالك صح؟
لما بتسمع كلمه سمعتها مني بتفتكرني صح؟؟؟
لما بتعجبك عيون بنت لسه بتقول ان برضه عيوني احلي صح؟؟؟؟
لسه شايل صورتي؟؟
ولسه بتشوفها قبل ماتنام؟؟
ولسه عايز تسمي ابنك مازن؟؟
وبتحلم بيه
وتقلق عليه
وتغير عليه
صح؟؟
واوحشك؟
يعني انا وحشاك؟
علشان خاطر ربنا قول صح

مكتبتي

الفاجومي......بدايتي وحبيبي
روائع صلاح جاهين.....ملهمي
مشوار لحد الحيط....من اعاد الحياه لاشياء ماتت
باولوكويلو.....منجمي
فن كتابه الدراما......حلمي
ساحر الصحراء....نقطتي الفاصله
ذات....كتابي
سودوكو...لعبتي
روايات ماوراء الطبيعه......استاذي وذكرياتي
الشيخ امام.......مزاجي

نهايه

كانت هي برج الاسد..
كان هو برج الدلو...
كانت مشاعرها كالنار المتوهجه...
كانت مشاعره كالماء البارد....
ظلت نارها تتوهج...
ظلت مياهه تبرد...
انها الان رماد..
انه الان قطعه ثلج...!!!!!!

كافتريا بحري

انت ليه ذكرياتك مش فظيعه
ازاي عندي القدره اجي نفس الاماكن بتاعتنا كده عادي
من غير ما احس باي حاجه
يا نهار ابيض
لاهو انت بعد السنين دي كلها
طلع ماعندكش كاريزما!!!!!!!!!!!!!
غشاش

الكلام من فضه وانا بحب الفضه

علي الترابيزه دي قعدنا ساكتين خالص
وقبلها برضه كنا ساكتين خالص
فضلنا 5سنين ساكتين خالص
لا طبعا ماكنش اخرس
بس كنا كل مانتكلم نسيب بعض

عندي اراده من حديد

مش عايزه اعمل كده
بس هاموووت واعمل كده
انا فعلا مش عايزه
بس مش قادره اقاوم
يمكن لو عملت كده مره واحده
بعد كده اعرف اقاوم؟!
طب ما المره دي ضميري هايأنبني عليها قوي
لأ مش قوي
مره واحده وخلاص
ده قرار
طفيت النور العالي
ولعت النور الهادي
قاعدت سندت ضهري
وفردت رجلي
ومديت ايدي علي احلي حتي شيكولاته

ليه يا دنيا كده

ايه ده؟؟؟؟!!!
يعني ايه كده؟؟؟!!!
ازاي يعني؟؟؟؟!!!
يعني انت خلاص
مش هاتسمع معايه فيروز ومنير ؟
وانا مش هاولعلك سيجارتك
وتزعل لما تظبتني باخد منها نفس ؟
ومش هاتخاف عليه ؟
ومش هاغير عليك ؟
مش هاتقابل معايه اصحابي ؟
وتشوفني رجعت الساعه كام ؟
ومش هاكلمك اطمن عليك ؟
وهاتشيل صورتي من علي الكومبوتر ؟
وهاشيل صورك اللي علي الموبايل ؟
ومش هاتجبلي شيكولاته ؟
مش هاتجيلي من غير معاد علشان من المفاجئه اخدك بالحضن اول ما اشوفك ؟
مش هانحس ببعض واحنا بعيد ؟
مش هانتخانق وتصالحني ؟
ومش هاتبرقلي لما اهزر مع حد ؟
ومش هانصحي ونام علي صوت بعض ؟
ومش هانروح السينما ؟
ولا هاتوديني الحسين ؟
واسكندريه كده خلاص مش هاتشوفنا مع بعض تاني ؟
دي حتي تزعل منا قوي
مش هاتوشوشني لما اخاف وتقولي انا موجود ماتخافيش؟
ومش هاحس ان قلبي بيهدي الا لما اشوفك قدامي؟
ومش هلاقي ريحتك في ايدي بعد ماتمشي ؟
ومش هاختار هدومي برفاناتي علي زوقك ؟
ناقص تقولي اننا هانعمل كل ده مع ناس تانيه غير بعض !!!!
يعني احنا هانبقي اتنين مش واحد؟؟!!
لا لا اوعي تهز راسك كده وتقول ان الكلام الفراغ ده الحقيقه
ياااااااااااااااااه احنا هانسيب بعض قوي كده

وهاضحك علي الدنيا

قررت في يوم اعمل نفسي نايمه
واصحي فجأه
في احلي لحظه في حياتي
وابتدي من هناك
واخلي كل اللي فات ده كابوس مخيف
وهخلاص
هاغمض عيني
ماعرفتش اختار اللحظه اللي منها هابتدي
واديني اهو بكمل االكابوس

عندي سؤال

يعني ايه نصيب؟؟؟!!!
يعني ايه اتنين بيحبوا بعض قوي
يبعدوا عن بعض فجأه
وهما لسه بيحبوا بعض
والناس تقولهم.....
ده مقدر ومكتوب
قسمتكوا كده...
اهو هو ده بقي النصويب...
ويسبوهم ويمشوا...
ومايفضلش غير اتنين قلبهم مكسور
والنصيب واقف بيضحك...

كلام جديد

بقالي كتير ما كتبتش

وحشت القلم حبره جواه خنقه

بس مش عايزه اكتب

لا انا مش عارفه اكتب
حتي لما حاولت القلم خاصمني
ماهو برضه عنده كرامه
فضلت احايله واحلفله اني مش هاعمل كده تاني
كتبنا وكأننا ماكتبناش قبل كده
زمااان كنا بنكتب
"لقد بدات التجربه في سن لا يسمح لها بالابواب الخلفيه...!!!!"
كلام مجعلص
فلسفه فاضيه
سفسطه لعلاقه فاشله
كلام محجب
بس يمكن يكون كلام حقيقي
لاحساس حقيقي
لشخص مش حقيقي
دلوقتي
انا والقلم وبس
كلام مايص مش موزن بس اكيد حقيقي
كلام عايق مش مترتب لكن محسوس
كلام لابس قصير ومابتكسفش
كلام يتغزل في حته شيكولاته
ويحكي احساسه بالناس كلها
كلام مليان حريه

وانا في الشغل

صوت التليفزيون
مزيعه عماله تزززن
وصوت مكن
شغال يوووور
وموبايل بيرن
رنه متوتره جدا
وانا معديه من قدام مرايا
فجاه ماسمعتش اي حاجه
لاني ببساطه ماعرفتش
مين اللي كانت بصالي من المرايا دي
ماخفتش
ومديت ايدي اسلم
مدت ايديها
ضحكتلها..ضحكتلي
قربنا ايدينا علشان نسلم
ادينا خبطت في المرايا وماسلمتش
عرفت ان بيني وينها حاجز
زعلت قوي
وهي كمان زعلت
كان نفسي قوي اتعرف عليها
لسه هاكلمها من بعيد
الموبايل ررررررن تاني
والمكن رجع يووور
ياااااه دي المزيعه لسه بتززززن

ملح الارض

قاعدت افكر كتير
هما الناس المهمشين
عارفين انهم مهمشين؟
ولا كل واحد جوه نفسه سيد؟
طب لو سيد احنا ليه شعب عبيد؟
ولااااااا احنا شعب عبيط؟

عم نجم

احمد فؤاد نجم

شاعر تكدير الامن العام

وعدل مزاجي الخاص

باولو كويلو

مش باولو كويلو اللي علمني اقراء العلامات

بس هو اللي فهمني ان العلامات

لغه كونيه

شبرا وجمال شبرا

شبرا قريبه من كل حته
الزمالك - المهندسين
مصر الجديده - وسط البلد
الطريق الزراعي -محطه مصر
شبرا زحمه بس بتمشي بسرعه
فيها احسن مسيحي ومسلم
ماتفرقهمش عن بعض
فيها احلي مقله لب
واجمد طعميه وعيش تجيبهم من شبرا
يمكن ناسها غلابه
بس هيه اصيله
انا اتولدت في طنطا
وكليتي كانت في المنيا
وعايشه وبشتغل في مدينه نصر
وبحب اسكندريه
بس عمري ما نسيت شبرا

واحد اسكندراني

واحد بحبه مره قال
احنا مش قد البحر
ولما نيجي نعافره ويغلبنا نقول عليه غدار
حبيته قوي لما قال كده
حسيت انه شبهي
وفاهمني
والاهم انه فاهم البحر
اصله اسكندراني
متربي علي صوت البحر
والجري تحت المطر
وكورنيش اسكندريه القديم
وبيركب الترام
وبيشرب احلي شيشه تفاح
عارف مواعيد النوات
واساميها
وبيهرب ن زحمه اسكندريه في الصيف
ومايطلعش منها في الشتا
زي اللي عليه احكام
اه بيوحشني
بس انا اللي اروحله
اصلي عمري ما شفته
من غير ما تكون خلفيته البحر

الشتا

خسرت خساره عمرك
يااللي ما رحت اسكندريه في الشتا
تبقي ماشفتش جمال
تبقي ما عرفتش الحقيقه
وهاتعيش طول عمرك
في وهم ان البحر غدار
وان اسكندريه برد في الشتا
اسكندريه كل ما تشتي
يا ابني بتدفي
وبعد كل نوه
نسمه حلوه
البحر فعلا مش غدرا
ولا هو يعني علشان ساكتلنا
وقاعد من كام مليون سنه يتفرج علينا
روح وشوفه في الشتا
هاتعرف انك مش اده
وانه اقوي منك وبيحذرك
انك ماتستهونش بيه
ومش مشكلته خااااااالص
انك ماروحتش
اسكندريه في الشتا

مامتي

زمان عم احمد فؤاد نجم قال
(لما بتكرهه..تكرهه موت
ولما تحب ..تحب صبابه
واما بتفرح..يبقي الفرح علي البوابه
واما بتزعل تبقي ربابه)
ده اكيد بيتكلم عن امي مش عن مصر
امي اللي تبان اصغر مني بس شايله الهم
شايلاه من ضغرها شيل
لا تعبت ولا حتي قالت بم
اه هي غاويه شويه افلام واغاني
من اجل ابنائي
وكتاب حياتي
وحكايتي مع الزمان
بس برضو ضحكتها تجنن
طول عمرها جميله
خدت حظها في جمالها
واحتمال في عيالها
بس اللي اضمنهولها
انها ليها بدل الجنه كذا جنه
مش قادره اوعدها تشوفني احسن واحده
ولا حتي اجمل واحده
كل اللي اقدر اوعدها بيه
انها تلاقيني اكتر واحده
بتحب واحده
اسمها ماما
وابو ام اللي يزعل يا شيخه...

مستشفي الساحل

كان في قدام بيتنا مستشفي
وكان واضح ان عزرائيل عنده اوردر هناك
كل يوم الساعه 6 الصبح
وانا معاد صحياني كان 7
بس كل يوم كان لازم اصحي 6
علي صوت اهل الاخ اللي روح مع عزرائيل
ودي من الحاجات اللي خلتني اكرهه الموت قوي
علشان كان بيصحيني بدري

فخفخينا علي لون بني

الفــخــفـخـيـنـا
كل العصاير علي بعض
الــلــون الــبــنــي
كل الالوان علي بعض
الانســــــــــان
ملاك وشيطان مع بعض
الــــبــــلـد
شوارع زحمه وشوارع رايقه حوالين بعض
الـــــــــخريطه
دول كبيره ودول صغيره فوق بعض
الــــنــــاس
ناس غنيه وناس فقيره بياكلوا في بعض
الــــــدنــــــيا
جنه ونار في بعض
الـــــضمــــــــير
ثواب وعقاب اد بعض

مافيش حاجه من دول ليها نسبه
كله فخفخينا علي لون بني

هي الدنيا كده

قلها كل اللي اتعلمته
احكيلها كل اللي شفته
لخصلها تجاربك علي شكل حكم ومواعظ
وسعات حواديت ال يعني انت ما تقصدش
فهما...الصح فين والغلط
اعمل كل اللي تقدر عليه
برضو..هاتمر بتجاربها الخاصه
وتعيش لوحدها احزانها وصدامتها
وتحلم احلام مختلفه
وتوصل او ما توصلش
بس في الاخر هايفضل معاها
شويه حواديت تحكيها لولادها ال يعني هي ما تقصدش
ومايعملوش بيها

عالم مزيف

لقد بدأت افقد الثقه حتي في صدق معاناتي...!!!

ياالــلـــــه...ياله من عالم مزيف.

سنوات... اكترُ نفس الذكريات..

سنوات... اتحدث معها في نفس الشئ..

سنوات...افكر معه في نفس المشكله...

سنوات..اعاني مع نفسي نفس المعاناه...

سنوات...احلم بغد بنفس الحلم...

انه ليس عالم مزيف فقط......انه ممل ايضا!!!!

وقبري يابني اوعاك تزور

لو عايزين تفتكروني

ماتعيطوش بعدي

اضحكوا

واضحكوا قوي كمان

اضحكوا علي الدنيا

بنت الايه

اللي ضحكت عليه وفهمتني

ان مافيش دنيا غيرها

انا مارحتش اخر المطاف

انا بس في مكان مافيهوش دوشه

لو عايزين تفتكروني

ما تروحوش قبري

روحوا اسكندريه

صدقوني

هاتفتكروني هناك احسن

من هناك

اوعي ما تجليش

والله

زعل منك موت

اوعي

تسيبني هناك لوحدي

و تنساني

كاني صفحه انطوت

او فيلم وخلص

تعالي كل ما تقدر

مش كل ما تفتكر

تعالي اقعد معايا

كلمني..

احكيلي..

واسالني..

زي مااتعودنا

زمان

ولا كان حصل اي حاجه

اه

مش هاتسمع ردي

المره دي

بس اكيد

هاتحس بيه

ولا ايه؟

بتعيط ليه؟!

انت مش مصدق ايه؟!

اوعي تفتكرني مش هاحس بيك

تبقي عبيط

بس انت كده حط اديك

مكان قلبي

هتلاقي الارض

بتنبض تحتها

وتقولك اني دايما فكراك

وعلي طول معاك...

ماكنش قصدي

لما قررت اسيب الارض
وانزل اعيش في البحر
كان الرمل بيمسك في الرجلي علشان ما انزلش
ما استحملش
من اول موجه سابني وجري
وفضلت كده خطوه خطوه الرمل يشدني
والبحر يبعده
لما الميه وصلت نص رجلي
الرمل استسلم وفقد الامل
لفيت لاقيت
الدنيا ورايا بتندهلي
بعد ايه؟
ماطول عمرها مدياني ضهرها
كـــرامــتـــــــــي
اديتها ضهري انا كمان
وسبتها ونزلت البحر
سمعت الهدوء
وشفت الضلمه
وكنت مبسوطه
لما نفسي اتخنق
طلعت
لاقيت
دنيا تانيه
يا تري وصلت اطاليا؟؟!!!!!

محاوله انتحار

وانا تحت الميه
وحشتني الدنيا
طلعت وبصيت عليها
بس افتكرت
ده انا زعلانه منها قوي
نزلت تاني
وحشتني تاني
طلعت تاني
افتكرت تاني
وفضلت كده انزل توحشني
اطلع افتكر
لحد ماخدت قراري
نزلت وماوحشتنيش
بس سمعت واحد بيصرخ
غـــــــــــريـــــــــق
شدوني لدنيا بقسوه
نيموني علي الرمل
بيحاولوا يفوقوني
وانا واقفه جنبهم
بحاول اقولهم اي حاجه
بصيت علي الدنيا
لقتني نسيت كل حاجه
ولقيتها حلوه قوي...

مدينه نصر وقرفها كان مالها شبرا

ناس جايه من بعيد علشان تشوف بلدنا
وناس جايه من الخليج هما اساسا اهل بلادنا
وناس راجعه بعد شوقه
ناس ماشفتش في الغربه الا الدوخه
ناس نايمه لحد ماتوصل
ناس بدردش
ناس خايفه
وناس رايقه
انـــــا ايــه داخلي بكل ده بقي؟!!!!
غير ان صوت طيارتهم ازعجني جدا

ذكري

يمكن بفتكرك ساعات..
لأ..يمكن بفتكره..
مش عايزه اوجهله كلام..
مش علشان مخصماه..
بس انا رفضاه..
يمكن بفتكره ساعات..
بفتكر تفاصيل بينا
وعود ماحصلتش
كلام ماطلعش حقيقي
اماكن ماعرفناش نسيب فيها ذكري
حرب لمشاكل مش موجوده
حب..لشخص بعد سنين طلع واحد تاني
فاتعملت معاه علي اني واحده تانيه
فابقينا اتنين غيرنا
ولما بصيت لنفسي ماعرفتنيش
افتكرته وقلت منه لله
بس حرام
هوذنبه ايه
غلبان برضه
مش يمكن ظلمته
ساعات بتمني ليه السعاده
بشرط
احس بيها الاول!

ورقه مقنعه

ليه القضبان متداخله مع بعض قوي كده؟!
وازاي القطار عارف يمشي علي انهي ويسيب انهي؟1
يمكن علشان عارف طريقه؟!
يعني اللي بيوصل هو بس اللي عارف طريقه؟!
طب مين عارف طريقه؟!
ولا يمكن علشان في حد بيسوقه للطريق؟!
طب نجيب منين حد عارف طريقنا؟!
وانا بفكر بصيت لاقيت ورقه طايره في الهوا
سمعتها بتقولي:
حلو الطيران ليه حابسه نفسك في الصندوق الحديد ده؟!
بتغظني الهانم..
رديت وانا يعني سكت..
هاطيري شويه وهاتقعي علي الارض وهايدوسوا عليكي
قالت:طب ما انتي ماوقعتيش علي الارض وبرضه بيدوسوا عليكي؟!
هنا..ماعرفتش ارد..
اقنعتني بنت الايه..
فتحت باب القطار قررت اجرب الطيران.

في وسط البلد

في وسط البلد
الدنيا زحمه
في وسط البلد
كنت دايما ماشيه باصه لفوق
اصله كان اطول مني بكتير!!
لما بعدي لوحدي
في وسط البلد
كنت برضه ببص لفوق
فخوره انا بمسرح ذكرياتي
بس انهارده
عيني كانت في الارض
يا دوب شا يفه مكان رجلي
عيني منك في الارض
يا وسط البد
يا ممر بهلر
يا شارع شريف
يا قهوه البورصه
يا ايامي الحلوه
يا شاهدين علي النهايه المره...

محاوله فاشله

كل ما اقعد قدام البحر
ببقي متاكده
ان في حد قاعد علي الشط التاني منه
في دنيا تانيه خالص عني
بيفكر في نفس اللي بفكر فيه
وانه جايز جدا يكون بيني وبينه مركب
قاعد عليها واحد
بيفكر في نفس اللي بنفكر فيه
كتبت اللي جوايه في ورقه
حطيتها جوا قزازه
ورميتها في البحر
علشان اللي علي الشط التاني
يشوفها
ويرجع عن اللي في دماغه..

كل ما اوزن

مش عايزه شعري
اوزن كلام
اللي جوايه اصلا مش موزون
طب ايه في الكون
موزون
انا بقول اهه
لو هاوزن هاغش في الميزان..

وارسم ليه

مش عايزه في شعري ارسم صوره

ما انا كنت في كليه الفنون
خمس سنين شبعت فيهم رسم
بس ما رسمتش اللي جوايا
علشان كده
دخلت الكليه
باعرف ارسم
وخرجت منها
يادوب بكتب اسمي..

ءاعـــــــــد ل

قوم امشي علي الحيط
ولف الاوضه داير مايدور
وارجع لنفسك النقطه
اللي منها ابتديت
هتلاقي انك بعد ما شفت
الدنيا بالمقلوب
هو دا اللي خلاك تعرف
تتعامل معاها
وهي بالمعدول...

شقاوه حروف

رسمت بالحبر الشيني

واللوان الجواش

رسمت بالوان الخشب

والقلم الرصاص

ظللت

ولونت

وحددت

مالقتش حاجه

تعبر عن اللي جوايه

بصدق

غير القلم الجاف

لما رسم حروف

ماشيه تتمخطر علي سطر

وسايبه سطر..

وكنت اظنها لن تفُرجُ!!

قعدت اعيط لوحدي
جات واحدي صحبتي
عيطت علي عياطي!
واحده تانيه جت
خادت المود
وعيطت معانا
التالته جت
وعيطت لانها
مش فاهمه
احنا بنعيط ليه!!
لما لاقيتهم
حواليه كده
نسيت كنت بعيط ليه
وفضلنا نضحك
احنا الاربعه للصبح..

انا بقي والرقم القومي

اناعندي سبعين سنه!!
كل امراضي
الجسمانيه
والنفسيه
والهم المكتوب في عنيه
بيقولوا ان عندي
سبعين سنه
صعب قوي اكدب نفسي
واصدق امي وابويا
والحكومه..

طب ايه بقه؟!!

هو لما سكت في اخر المكالمه
كان عايز يقولي حاجه؟؟
طب كان مستنيني اقوله حاجه؟؟
يااللـــــــــــــه
ده لما بس سكت هو ثواني
مانمتش انا يومين..

اسكندريه

اسكندريه

في ناس تقول علي جوك قاسي

وناس تقول علي بحرك غدار

وناس تقول ال سمكك غالي

وقال ايه كمان شوارعك زحمه!!!

بس انا بس اللي عارفه

عارفه ازاي انتي بلد بتنبض

وتحس باللي بيحبها بجد

وجايلها بشوق حقيقي

ساعتها بس

جوك القاسي يبقي

مزاجه

بحرك الغدار يكون

مرايته

والسمك الغالي

يرخصله

والزحمه في عز شتاكي

تبقي يادوب

كام واحد علي طول كورنيشيك

حنينه انتي مع اللي يحبك

يا اسكندريه

علشان كده يوم ما حبيت

حبيت من ولادك

يمكن علشان فيه كل صفاتك

ماهو تربيتك

ولا علشان يفضل قلبي طول عمري

متشعلق بيكي

انا ماحبتكيش علشانه

بس

ممكن اكون حبيته علشانك..

نوه حلوه

لسان جوه البحر
وانا واقفه لوحدي
في عز النوه
(دي نوه المكنسه ولادي نوه العوا؟)
موج عالي بيغرقني
وبطعم المالح يغريني
مطر سيل بيغسلني
وبطعمه العادب يرويني
هوا شديد يتحدي ثباتي
(اكيد دي نوه المكنسه)
هوا جايبلي معاه
ريحه اليود من البحر
والاوزون من الجو
والسمك من بحري
والشيشه التفاح من استانلي
منين ماتجيب عنيه مش شايفه مخلوق غيري
ملحمه من الطبيعه
علشاني لوحدي
ميه بحر
وميه سما
بيتخانقوا عليه
السما قريبه
والبحر قدامي نص دايره
واسكندريه ورايه بتكمل باقي الدايره
في اوسع من كده حضن؟
في ادفي من كده جو ؟
في كده اصلا؟!!!!
ازاي البلدي قادره تكون
حنينه قوي كده..

ناس

طول عمري بتخنق من الزحمه..

بمعني اصح..الناس شر لابد منه..

ماينفعش يبقوا كتير قوي..

لما بامشي في وسطهم ببقي خايفه اتكعبل..

مابحبهمش وبخاف منهم..

وباستغرب هما ازاي قادرين يستحملوا نفسهم..

وازاي لاقين ناس تانيه تحبهم..

لما قعدت في مكاني وماخرجتش ده كان لطيف..

حتي ماوحشونيش..

كنت بنام مطمنه..

بس ف يوم فتحت عينيه..

لاقتهم كلهم حواليه

لا..

مستحيل..

ايه الزحمه دي..

ده اكيد كابوس..وانا فعلا مافيش ناس حواليه..

الكابوس الحقيقي..ان ده مش حقيقي!!!

يعني الناس دول جوايا!!

طب وانا عيني بتبص لجوه؟؟!!..

دي ليله ناس..

يعني اسود من اسود ليله..(نااااااس)

عايزه اقلب عينيه ترجع تبص تاني لبره وماتلاقيهمش..

طب ماهم هايفضلو جوايه

خفت بس مشيت مابينهم..

واتكعبلت مرتين..لأ سته..

كان نفسي اصرخ فيهم يمشوا ويسبوني..

كان نفسي اقلهم مابحبكومش

بس كان لسه صوتي بيخرج لبره ماكنوش هايسمعوني..

والغريب انهم ماكنوش حتي بيبصولي..

ولما دققت فيهم لاقيت هناك بعيد واحده اعرفها..

سانده علي مرايتي..

مين دي..

شكلها مش غريب عليا..

قربت منها بعدت عني..

بصيت في المرايه وبصتلها

بس..عرفتها...

كنت انا واقفه وسطهم..

وفهمت اللي كنت خايفه افهمه..

ده انا كمان ناس..

الغريب اني ما بقتش خايفه!!!

رحله قطاع عام

مسافر بعد الجيش لاهله وارضه..

مسافره لبنتها اللي بتولد..

بيحلف انه بكره لما تعدل هايركب درجه اولي..

بتقلع السلسله هديه رزق النونو..

بيتفرج علي اجنده فيها ارقام تليفونات اصحابه في الجيش..

بتتفرج علي صوره بنتها..يا تري النونة حلو زيها؟؟..

اكيد حبيبته لسه مستنياه..

اكيد النونو حلو زي امه..

بس ام حبيبته وليه عقربه..

بس مصيبه لو طلع الواد شبهه جده..

كله يهون علشان خاطر حبيبته اللي مستنياه..

حتي لو الواد شبه جده..

لجل الورد ينسقي العليق..

ده اعز الولد ولد الولد..

وحشته حبيبته زمانها خلصت الدبلون..ده بيحبها من ايام ماكانت بتلعب معاه حجله في حوش بيتهم..

كبرت بنتها..ياااه العيله دي بقت ام زيها..دي كانت لسه يادوب امبارح بترضع من صدرها..

• حريق قطار الصعيد لم سفر الا عن موت اثنان واصابه 15وقد امر السيد/فلان الفلاني بصرف ثلاثه الاف جنيه تعويضا لاهالي الضحايه..!!!!!!!!!!!!!

من انا؟؟؟؟؟؟؟؟؟؟؟؟!!!!!!!!!!!!!!!!!!؟؟؟؟؟؟؟؟؟؟؟؟؟؟؟؟؟؟

انا السكون

انا الهدوء

انا الراحه

انا الواحه

انا التي تشتاقني عمرك كله

وترهبني مثل الموت ذاته

انا التي اذا اقتربت منها لن تبعدعنك ابدا

واذا بعدت عني اسعي اليك دائما

انا التي لها 1000وجه

تاره انا برضائك

تاره انا اختيار الاخرون لك

تاره اخري انا القدر

انا من تحيا داخل النفوس

انا وعن ثقه( اول واخر ) تجاربك علي الاطلاق

انـــــــــــــا الوحــــــــــــــــده

!!!!!